full ma breeks

full ma breeks wi win
that’s blawin aff the bay
sooth by sooth-west
snell an gustin

full the washin on the line
it’s crackin in the blast
caperin cleeshin airms
an birlin shanks

for the sea ablow’s risin
its tide floodin
an the waves’ fite mares
loupin the saut sweel
rollin hame tae plash
ower wrack an stane

full ma ain breeks wi gale
howl it roon an throu the legs
blaw oot the teem claith
like some pithless cheil

full the bay wi roch watter
fleein it in whips o faem
till it faas wi a rummlin licht
tummlin doon the slant tide’s ebb

for the day’s pirl’t ower
cloud and sky
kirn’t and glowerin
fierce drouth on the win
rowin the claes like sowels
fleein awa afore the faa o nicht

© BH, 2021

---

It wis a day o win on oor island an the washing wheepin dervishe-lik on the line. I saa ma breeks an thocht o the win on sea far-aff I came. 

Later on I thocht I should pit this oot for #scotstober. There are some think the leid's nae for fowk faas harns are sharp but I dinna gree. This micht see lik some couthy roon, bein aboot breeks an that, but, naw, it's metaphysical bein aboot the elements o watter an win an the wanton ferlies that skeich oor claes fan we're nae in them.